話說某健康水可以減少所謂既水份子團大小, 令到細胞可以更吸收, 於是俾錢做左份咁既報告:

簡單黎講份個實驗係拎兩樽水黎做 NMR, 一樽聲稱係馬拉水喉水, 另一樽係聲稱鑽石能量水。

疑問1: 個實驗究竟想比較乜

先唔講佢d 實驗品來源真定假, 但提供實驗品俾佢o個間公司都烏 sir sir, 若果佢想科學化地表達鑽石能量水係掂既話, 應該將個 label 寫為 "經鑽石能量處理的馬拉水喉水"。點解要咁寫? 因為要令兩個樣本既差別減少, 減少到唯一既分別係"經鑽石能量處理"同"未經鑽石能量處理"既馬拉水喉水, 如果唔係點知你d 經鑽石能量處理既水黎自邊度? 邊度都得架啦, 香港水喉水又得, 喜瑪拉亞山雪水又得, 如果係咁既話, 個實驗分分鐘變左馬拉水喉水 vs 經鑽石能量處理既喜瑪拉亞山雪水既比較, 咁得出黎既結果究竟係証明經鑽石能量處理係掂, 定係喜瑪拉亞山雪水本身掂…

疑問2: line width 究竟係乜

咪自作聰明 line width 即係水份子團既大小, NMR 即係核磁共震, 氧份子通常有8粒中子, 叫做 O16, 而NMR 只可以輕微令到多左一粒中子既 O17 產生共震 (題外話, 咁 O17 會唔會健康d? 未有研究証實), 有共震即係代表有 O17 既存在, 亦可以從共震資料去估計含有 O17 既份子結構, 可以係水, 亦可以唔係水, 但點都唔會係水份子聚集結程度。當中既 line width 係指圖表入面個 peak 既一半高度時既闊度:

來源: http://www.scs.uiuc.edu/~mainzv/Basics/linesh.htm

闊度越大, 最多可以話係雜質多d (你求其買個濾水器都可以去雜質), 而唔係O17多定少, 更加唔係水份子團大小! 同埋所謂既水份子團, 好多科學家都一再澄清係唔存在。

所以傳銷公司對依d 所謂既科學實証會謹慎地"唔俾流出黎俾人睇", 通常曬一曬就收返埋, 因為俾其他對依方面有研究既人知道既話一定笑死, 係唔知依份野點解會流左出黎到 Internet 度。我記得上次應酬人去傳銷, 我差d 忍唔住笑左出黎, 竟然有個叫遠紅外線學會既東東証明某d野有效, 你不如攪個微波爐高頻學會証明可以整熱d 食物, 當時我想問 d 傳銷拎個 copy, 佢地人都唔俾! 如果唔係又多樣野可以笑。所以依d 野留返黎呃下d無知婦孺吧,咪放上網俾人踢爆。