早排講過郵局做電子証書, 俾佢最大既客仔 – 政府網頁, 本身都有問題, 估唔到原來經已蝕左兩億。
【本報訊】香港郵政推出電子證書七年以來，嚴重虧損近二億元，審計署報告批評郵政對電子證書使用量過份樂觀，推算04至05年度結束前，發出900萬張電子證書，累積盈利3.21億多元，但結果至今虧損近二億元；2003年市民開始更換智能身份證，郵政估計有六成市民將電子證書載入智能身份證，但其後需要調低至三成。審計署批評當時的工商及科技局和香港郵政，在較早階段已知道電子證書申請率偏低，應盡早重新審視項目。
當年我都有俾十蚊將張電子証書做落張身份証度, 因為都想試下, 心諗蝕都係蝕十蚊, 方便我係網上填一兩次表都當佢回本, 但後來我試用佢黎填表時發覺又要裝個唔知乜 program, 又要攪一大堆野, 覺得太麻煩所以到將証書 expiry 都未用過。
我亦都知道做 trading 網上報關咁樣會方便d, 係身份証度裝電子証書之前, 已經有人用 Floppy disc 過落電腦做報關, 不過做左落身份証之後, 因為部電腦冇身份証 reader, 結果都係要靠隻 Floppy disc 過返落部電度。
初期馬會只接受有電子證書既人投注, 但後來都係嫌麻煩唔駛要電子證書, 你問做 IT 既十個有九點九個對電子証書一知半解, 你仲要叫d 盲毛去用, 即係想玩死人。
所以當初都唔知班人憑乜認為可以靠 end-user 賺錢, 要賺既話應該先做中小企 普及化。當初香港郵政攪電子証書, 我仲歡天喜地咁以為係伺服器証書價格可以調低到一個普及化既水平, 等我可以唔駛幫襯 Verisign。結果雖然收費只係 Verisign 既三分之一, 但係都唔算吸引, 我認為如果能夠到十分一先得。
我咁講並唔係獅子開大口殺價, 而係張証書就算係 Verisign 既十分一, 對d 做電子商貿既企業黎講都唔會吸引, 因為 7,000 同 700 差別唔大, 反而信心先係一個最大考量。 不過咁既價對中小企黎講會吸引, 中小企做內聯網或 data exchange 既就相對會應用多一d 電子證書, 多人應用先多人用黎做証, 咁先係普及。
普及之後你郵政有咁多証書「專才」, 自然多機會做 solution, 依d 先係開始賺錢。然後自然多人做落身份証度。之不過連政府伺服器都攪成咁, 香港真係 ITの悲劇。