首先我只係一個乞客 (begger), 只不過識既電腦知識比普通人多少少, 所以好多人疑似我係一個黑客, 攪到身邊人成日問我點做一個黑客。聽完佢地既目的, 我覺得佢地實際上係想做一個破客 (自創的, cracker), 而唔係一個黑客(hacker)。
破客指用一d 現成既工具將密碼破解或者利用漏動入侵人地部電腦, 而黑客就係用自己既知識創造工具黎做破客既野, 至於乞客呢… 就係好似我咁係網絡裸求跪求依樣個樣既人。有d 細路十三四歲就下載d 黑客寫既程式, 然後左改右改成為一個更厲害既電腦病毒蠕蟲, 雖然佢地唔係發現漏洞既人, 甚至對漏洞原理可能一知半解, 但係我覺得咁都算係黑客, 至少佢地都知道點樣將入侵程式轉化為更強既病毒。
破客
破客比起黑客易得多, 而家係互聯網好容易搵到d 入侵或者密碼破解工具, 以前冇 search engine 要搵依d tools 唔容易, 甚至乎要靠 BBS 黎搵。而家要做個破客只要花點心機同時間 search 下就得, 所以要我教人做破客就真係冇野好教, 只可以教佢地努力d搵檔案就得, 至於d 懶人, 咪學我做乞客吧, 連乞都懶既做癈客, 自己癈飽佢唔好煩我。不過做破客我會建議 search 之前最好搵部可以隨時 format / recover 既電腦黎下載檔案同測試, 如果唔係中左毒就麻煩。
黑客之路
至於做黑客, 要去創造工具就要識得編程, 簡單既編程語言都得, 要型既話就一定要用 PERL! 點解? 因為相信 PERL 係可以以最少行數寫出一個黑客程式, 而且冇乜人睇得明 (自己亦都睇得好辛苦)。最困難既地方就發現漏洞, 就以 networking 黎講, 可以有好多個唔同既 layer, layer 之中又可以有好多既 protocol, protocol 又可以俾唔同既 protocol 同 encryption 通過, 樂觀咁睇就即係好多機會搵到漏洞, 悲觀咁睇就即係學海無涯…
如果真係有心, 可以搵d 簡單d 又比較舊既漏洞, 若果有良好編程底就可以向 buffer overrun 進發, 冇乜既話學sql injection 可能會簡單少少, 但係而家比較少直接 sql injection 既 site, 雖然依然有好多 cookies sql injection, 但係對於冇 web programming 底既又會難少少。有少少 networking 底既可以寫下 network sniffer, 可以好容易截到好多資料, 不過實在太簡單…簡單到有d 侮辱自己既智慧。至於乜都唔識又唔想學編程既就放棄吧。
不過成為一個強既黑客唔係一朝一夕既事, 所以初期唔可搵一個特定既目標, 即係例如一定要破某某相冊, 咁如果不斷咁唔成功, 錯敗感係好大, 當然如果你有打不死既精神梗係冇問題。用一d 簡單易明既漏洞黎試下, 總會有d 機會中招既, 成功左就可以試下其他方法, 當你掌握得咁上下, 要攻克一個特定既目標就變成一個可能既事, 若果唔成功即係自己功力未夠, 繼續鍛鍊一下吧。
有時候太過用死一個方法係玩死自己, 曾經睇過本書教人做黑客, 講一個黑客破極都破唔到一間公司既密碼, 於是佢去間扮去間公司維修電腦行一轉, 咁就俾佢唔覺意裝到個密碼。
至於係香港做黑客有一樣係好重要, 一係你要有錢有地位, 或者係高材生讀名校, 咁就算俾人拉左… 你明架啦, 唔明就唔好去做黑客, 去做烈士吧。
道德黑客
順便講一下, 好多人d 人會將黑客神化左, 將自己定位為道德黑客 (ethical hacker), 其實咁樣好好笑, 話說係未有互聯網既時代已經有黑客, 佢地通常聚集係 BBS, 當時邊有道德黑客依個名 (仲要係一個咁柒名), 況且佢地既理念大多數係無政府主義 (anarchism, 係某d 國家或機構, 依個字等於中國既水去車侖工力, 被禁, 其實網民大多數都係咁, 遲下再講), 同道德大纜都扯唔埋。所謂既 ethical hacker 指自己去 hack 人純粹學野, 然後用黎增強自己同其他人既保安, 但係進攻係最佳既防守, 強既 hacker 明白到電腦漏動實在太多, 所以防黎都晒氣, 做左基本防衛就算, 最多開多幾台 dummy 機你 hack, 所以 ethical hacker 都係留返黎俾人扮正氣呃飯食吧。
奇遇少年黑客
香港黑客其實都有, 但相對一d 出名多黑客既國實在太少, 而且我遇到既多數係外籍人仕, 而且有唔少係中東同印巴藉。話說互聯網岩岩開始時我係間 ISP 度打工, 當時一個人留守公司, 突然有個十四五歲既中東/印巴籍男仔黎門口禁鐘, 當時我只係一個十七八歲既暑期工, 所以一見如故咁樣一齊吹水, 原來佢早幾個月 hack 左樓上間 ISP d server, 拎左好多 VISA 卡號碼同埋免費上網, 諗住 hack 埋我地但係又冇辦法, 所以落黎睇下我究竟係一個點既人。諗返起佢可能都係想黎搵機會搵密碼, 而我又大意左, 嘿嘿!
