睇完集結號依套戲之後, 見到網上一則影評純粹為評而評, 評論既人就好似一個睇開少女漫畫突然去寫一篇文黎評價暴力漫畫一樣, 客氣d 講佢唔係咁識欣賞。

首先佢所講嗰種令人’搖得昏昏入睡’既拍攝手法, 主要由雷霆救兵開始興起, 將戰場上實際亂七八糟既視覺, 同埋現代戰爭爆破產生既耳鳴帶俾觀眾, 臨場感令觀眾由旁觀者成為參與者。依一點集結號做得到, 而且亦唔比 Hollywood 級差太多。至於個別觀眾喜唔喜歡又或者有冇新意, 雖然電影算係一個創意行業, 但潮流係咁, 對於國內少有既戰爭片係唔係太過苛求呢。

另一個個人對戰爭片既考量就係歷史考証, 因為戰爭片本身係曾經發生過既歷史, 所以依方面我都幾著重。香港同中國成功既戰爭片基本上係冇, 大家見到既古代戰爭片對我黎講只不過係武俠片, 唔計個人武功超乎常人, 戰場上出現脫離現實既情況普遍到令人可以當笑片, 例如岩岩睇左既江山美人, 係戰場前線打打下可以返大營吹下水,媾下女, 然後可以出去劈過, 真係佩服到五體投地。講返正題, 集結號係依方面亦好細心, 由戰場佈置到軍隊衝鋒, 都切合當時既戰術。

或者要投訴既就係套戲冇交帶清楚, 乜野係連長團長, 攪到觀眾以為佢地係乜野將軍, 或者更注重視覺效果同缺乏劇情既雷霆救兵更適合依一類觀眾。

講起劇情, 近幾年既戰爭片比以往更著重劇情, 以往通常用畫面同埋激昂既演繹黎帶俾觀眾特定既訊息, 係直接而明確。相反, 集結號既劇情更能夠刻劃主角既心路歷情, 俾觀眾更多空間去思考, 欺騙與懷疑, 出賣與犧性, 你認為連長係被出賣為團長走佬而死守, 定係被安排為其他人既撤退而犠牲? 視乎你觀眾既睇法。

所以我成日掛係口邊既係, 好多人識飲識食, 但有幾多人懂得去欣賞。電影亦都係一樣。