依套片可能係英雄既第二集, 當係武俠片睇算, 唔好認真咁去睇, 如果唔係會嘔血。

雖然有好似雷霆救兵既斷手斷腳既場面, 場面浩大震撼, 不過依然擺脫唔到舊有武俠片既影子, 主角武打動作場面精彩, 但係d 臨記組織得比較兒戲。例如兩陣交鋒大家用矛, 明明敵人係前面都係指天督地, 當太平軍包圍佢地三兄地嗰幕我真係笑左出黎。所以點解黑澤明套天與地冇乜血肉橫飛, 但我會覺得佢地真係打緊仗, 就係因為佢地d 武器至少向住敵人。至於之後既圍城戰壕就更搞笑, 嗰個年代圍城通常會起土牆而唔係掘戰壕, 原因係火器射程有限, 圍城又唔需要靠近敵城, 高居土牆上可以阻止敵人突圍, 而戰壕就完全冇咁既效果, 而且仲要擔心落雨變水坑。

仲有就係清軍入村搶糧時邊有咁多燧發槍。

講起火槍, 其中舒城一戰有太平軍枝槍係從後上彈, 當年日不落帝國既部隊都未開始裝備, 不過太平軍有d 咁先進既槍械都有少少可能既, 因為係 17XX 年發明, 而當時係184X-6X年, 所以算數吧。

有d 人會問做乜事d 火槍做乜事槍口唔裝刺刀? 首先裝填子彈係從槍口, 如果有刺刀就唔方便, 另外火槍手當時唔算得一線部隊, 通常都係低級士兵並唔係主力,  就算有刺刀見人沖埋黎都可能落荒而逃。而歐陸戰場火槍隊屬於軍隊重心, 訓練有素, 士氣先可以保持而唔會咁易逃走, 先至有短兵相接既實用價值。 刺刀係敵人非常接近時, 又或者發射幾次之後先裝上, 然後就係衝鋒短兵相接。

所以投名狀絕對稱唔上史詩式鉅片, 最多只係場面浩大既武俠片。

至於劇情不合理既地方亦有唔少, 例如劉華中計去救李連傑竟然係單拖, 雖然劉華部下解散, 但單拖就真係太攪笑了。另外李連傑臨尾就職將椅, 竟然係金色既龍椅, 好有可能係之前幾套武俠片用剩黎頂檔, 導演又見順眼咁就拎嚟用。

後期製作方面, 投名狀犯下左一貫有軍隊場面既問題, 就係不必要地使用步操聲。由開場運糧到巡邏, 都係要夾硬配d 步操聲落去, 同個畫面極之唔夾。另外配音方面唔知點解做得奇差, 冇一幕有現場感, 燧發槍更加欠缺左金屬撞擊既聲音…

唯一值得一讚既除左畫面衣著同埋佈置外, 就係金城武, 佢好有木馬屠城既畢比特個種型得黎又要演到個白痴角式, 要知道要佢演好似初初當山賊嗰種俠客唔難, 但係慢慢轉變成為一個愚忠既白痴就唔易, 眼神由精靈變呆滯, 比起畢比特由一開始就係有勇無謀難度高好多。對比之下李連傑就冇咁突出, 戲份多角式矛盾亦多, 但可能戲情交待得唔足之下, 感覺佢冇乜發揮。